Përplasja, Wadephul: I besojmë vetëm ODIHR për reformën zgjedhore, Rama: Jo, ODIHR-it

Nënkryetari i grupit parlamentar CDU/CSU, Johann David Wadephul, i ka bërë thirrje Shqipërisë që të arrijë një konsenus në Këshillin Politik për reformën zgjedhore. Wadephul ia tha këtë DW, pas takimit që ai pati në Berlin me Ministrin në detyrë për Punë të Jashtme, Gent Cakaj.

Wadephul-i i tha DW në përfundim të takimit, sot në Berlin, se Gjermania e mbështet Shqipërinë në plotësimin e gjashtë kushteve të vëna nga Bundestagu. Por ai shtoi se ka ende për të bërë. “Kthejuni konsensusit në Këshillin Politik. Dhe jepini ODIHR-it mundësinë që të vlerësojë ndryshimet që do të arrihen në Këshillin Politik për listat zgjedhore. Vetëm nëse thotë ODIHR-i se reforma zgjdhore është në përputhje të plotë me kriteret e OSBE/ODIHR-it, atëherë edhe ne do ta kemi të lehtë që të themi se është plotësuar edhe kushti i reformës zgjedhore.”

Cakaj ndodhet në Berlin për një vizitë dyditore për të lobuar për hapjen e Konferencës së Parë ndërqeveritare. Deri tani ai është takuar edhe me Kryetarin e Komisionit Parlamentar për Çështje të Evropës, Gunther Krichbaum, dhe me Ministrin për Cështje të Evropës, Michael Roth.

Ndësra Gjermania kërkon një reformë zgjedhore të konsultuar dhe miratuar nga ODHIR, Rama është shprehur në mënyrë kategorike kundër përfshirjes së ODIHR në diskutimit për ndryshimet e Kodit Elektoral. Nga ana tjetër lideri i opozitës, Basha ka kërkuar përfshirjen e ODIHR në diskutimet e reformës zgjedhore.

Duket qartë se Rama ka një përplasje të hapur jo vetëm me opozitën, por edhe me ndërkombëtarët në lidhje me ndryshimet që kërkon ti bëjë në mënyrë të njëanshme Kodit Elektoral.