Cikloni “Janos” godet Greqinë, a rrezikohet Shqipëria nga stuhia e fuqishme

Cikloni “Janos” ka mbërritur në Greqi dhe efektet e motit të keq kanë filluar të ndihen në pjesë të ndryshme të vendit. Në Katakolo, filluan erërat dhe shirat rreth orës 18:30 ndërsa do të arrijë deri në rajonin e Atikës, ku ndodhet kryeqyteti Athina.

Zakynthos, Ithaca dhe Kefalonia janë 3 ishujt ku cikloni ka lënë më shumë dëme duke shkatërruar varka në mole, përmbytje rrugësh dhe dëme të mëdha. Fillimisht cikloni mesdhetar ishte vendosur midis Zakynthos dhe Kefalonia dhe për momentin Ilia dhe Messinia janë në vorbullën e saj, me erëra të fuqishme që kanë goditur zonën.

Më pas, moti i keq pritet të lëvizë në perëndim të Kretës. “Janos” pritet të bllokohet në Gjirin e Patras dhe të qëndrojë atje për një kohë të gjatë, duke shkaktuar erëra dhe stuhi në zonë. Sipas Nikos Hardalias, cikloni do të qëndrojë në perëndim për 6-9 orë dhe më pas do të lëvizë në jug të Greqisë.

Meteorologia Adiola Bami ka folur rreth ciklonit që pritet të kap brigjet e Italisë dhe Greqisë në orët në vijim. Bami theksoi se Shqipëria qëndron në periferi të ciklonit, dhe preket fare pak prej tij, ku gjatë natës së sotme do të kemi një fórcim të parametrave të erës duke arritur deri në 50km/h.

Gjithashtu meteorologia u shpreh se do të ketë rrebeshe të shkurtër shiu në zonat bregdetare.