Shtohen 6 vatra të reja me Covid-19, dyfishohet numri i të prekurve

Numri i të prekurve me koronavirus është rritur sërish gjatë 24 orëve të fundit në vend. ISHP njoftoi sot për 17 raste të reja me Covid-19 duke e çuar në 820 numrin total të të prekurve.

Një ditë më parë u konstatuan 8 raste të reja me koronavirus.

Gjatë 24 orëve të fundit janë kryer 270 testime për persona të dyshuar me COVID-19 dhe prej tyre rezultojnë 17 raste pozitive.

11 të prekur janë kontakte të rasteve të mëparshme pozitivë me COVID-19, ndërsa për 6 të prekur po vijon hetimi epidemiologjik në terren, pra janë vatra të reja.

Rastet pozitive të ditës së sotme janë të shpërndara përkatësisht, 9 raste në Tiranë, 5 raste në Krujë dhe Kamza me 3 raste, vatër familjare.

Shpërndarja gjeografike e rasteve aktive është si vijon:
Tiranë 99
Krujë 81
Shkodër 15
Kurbin 9
Elbasan 3
Kamëz 3
Kukës 2
Mirditë 2
Berat 2
Durrës 1
Korçë 1
Lezhë 1