Trafiku i drogës/ Gazeta italiane: Lirohet kushëriri i ish-ministrit që zhyti në krizë Ramën

Gazeta italiane online, MeridioNews, e cila shpërtheu e para skandalin e përgjimeve të Moisi Habilajt, ku implikohej edhe ish-ministri i Brendshëm, Saimir Tahiri, ka raportuar për lirimin e Habilajt.

Sipas saj, Habilaj ishte dënuar me 15 vite burg dhe ishte konsideruar kreu i një grupi të specializuar në importin e drogës dhe armëve nga Shqipëria.

Pas tij, një histori ndërkombëtare spiunazhi që futi në krizë qeverinë e Edi Ramës”, shkruan gazeta.

Habilaj do të kalojë në arrest shtëpiak pas 954 ditësh në qeli. Ai u arrestua më 17 tetor të vitit 2017. Ai nuk do kthehet në Shqipëri, por do jetojë te vëllai. Mësohet se ai nuk duhet të ketë asnjë kontakt me persona të tjerë, por vetëm me ata me të cilët jeton.

“Pas arrestimit në vitin 2017, një krizë politike shpërtheu në Shqipëri, që lëkundi qeverinë e kryeministrit Edi Rama. Ish-njeriu i tij i fortë, ish-ministri nga viti 2013 deri në vitin 2017, Saimir Tahiri, përfundoi në bankën e të akuzuarve nën hetim nga Prokuroria e Krimeve të Rënda në Tiranë. Gjykatësi e dënoi me 3 vite burg për abuzim me detyrën përballë 12 viteve të kërkuara për implikim në trafik droge. Tahiri u hetua edhe nga prokuroria e Katanias, por dosja u arkivua”.