Lufta e re Trump-Kinë për “virusin kinez”

Kina ka reaguar me zemërim pasi presidenti i SHBA-së, Donald Trump, i referohej coronavirusit si “kinez”.

Një zëdhënës i ministrisë së jashtme paralajmëroi se SHBA duhet të “shikojë punët e veta” përpara se të stigmatizojë Kinën.

Ndryshe, rastet e para të Covid-19 u regjistruan në qytetin kinez Wuhan në fund të vitit 2019.

Sidoqoftë, javën e kaluar një zëdhënës i ministrisë së jashtme kineze ndau një teori konspirative, duke pretenduar se Ushtria amerikane e kishte sjellë atë në rajon.

Akuza e pabazuar bëri që Sekretari i Shtetit Amerikan, Mike Pompeo, të kërkojë nga Kina të ndalojë përhapjen e “dezinformatave”, ndërsa u përpoq “të zhvendoste fajin” për shpërthimin.

Siç raportohet, deri më tani, mbi 170,000 raste janë regjistruar në të gjithë botën, me më shumë se 80,000 në Kinë.

Sidoqoftë, të martën, Pekini tha se kishte regjistruar vetëm një rast të ri në Kinë, me të gjitha rastet e tjera të reja të sjellura në vend.

Por, çfarë tha Trump, për të cilën deklaratë reagoi Kina?

Presidenti amerikan publikoi një postim në Twitter të hënën duke e përshkruar coronavirusin – që shkakton sëmundjen Covid-19 – si “virusin kinez”.

Sipas BBC, Organizata Botërore e Shëndetit (OBSH) ka paralajmëruar kundër lidhjes së virusit në ndonjë zonë ose grup të veçantë, për shkak të rrezikut të stigmatizimit.

Sidoqoftë, një numër i zyrtarëve të administratës amerikane e kanë cilësuar atë si virusin kinez. Ndërkohë, z. Pompeo i është referuar vazhdimisht “virusi Wuhan”.

Cili ishte reagimi?

Geng Shuang, një zëdhënës i ministrisë së jashtme kineze, tha se tweet-i është “stigmatizimi i Kinës”.

“Ne i bëjmë thirrje SHBA-së të korrigjojë gabimin e saj dhe të ndalojë akuzat e saj të pabaza ndaj Kinës”, shtoi ai.

Agjensia zyrtare e lajmeve në Kinë, Xinhua, tha se gjuha e zotit Trump ishte “raciste dhe ksenofobike” dhe zbuloi “papërgjegjshmërinë dhe paaftësinë e politikanëve”, duke rrezikuar në rritje frikën ndaj virusit.

Po sipas BBC, kritika kanë ardhur edhe nga brenda SHBA-së, me kryetarin e bashkisë së New York-ut, Bill de Blasio, duke thënë se fraza rrezikonte “të nxiste më shumë fanatizëm” kundër aziatiko-amerikanëve. /Telegrafi/