Flet mbesa e gruas që vdiq nga koronavirusi: Nëna i kërkoi vetë doktoreshës një tampon, por u refuzua

Mbesa e 73-vjeçares Q.G, e cila humbi jetën në spitalin e Durrësit për shkak të koronavirusit, duke u bërë viktima e parë në vendin tonë, ka sqaruar të gjithë ngjarjen e ndodhur në një mesazh drejtuar gazetares Fatma Haxhialiu…

“Ime më i ka kërkuar vetë doktoreshës një tampon për koronavirus për nënën duke parë situatën e nënës që po përkeqësohej pa arsye, tampon ky që u refuzua nga doktoresha me justifikimin që ajo nuk ka shenja klinike”, shkruan mbesa e viktimës.

MESAZHI I PLOTE

Fatma, po ju shkruaj për rastin e viktimës nga koronavirusi në Durrës dhe ndoshta ndërgjegjësohemi ne si popull për të kuptuar se jo çdo gjë që na shitet si lajm, është e vërtetë.

Ndoshta dikur do arrijmë të kuptojmë se për të bërë një lajm, duhet së pari të pyesësh personat përgjegjës për atë lajm se si qëndron e verteta.

Zoti na sprovoi me humbjen e njeriut tonë të dashur e ne po mundohemi të mbështetemi në Zot qe me durim të mirë ta kalojmë këtë situatë.

Nëna ishte në shtëpinë time në Itali ku u diagnostikua me pulmonit dhe ndenji e shtruar për 6 ditë, pati shumë përmirësim dhe pasi u kalua nga antibiotik venoz në antibiotik tablet, u nxorr nga spitali dhe u la një periudhë kohore 10-ditore për të parë si vijonte gjendja dhe çfarë ilaçesh duheshin ndryshuar.

U kthye në Shqipëri për shkak se atje ka banesën e saj në Durrës dhe donte të ishte atje për rikontroll pasi e ndjente veten më mirë.

Në rikontrollin që bëri tek pneumologia në Durrës, pas grafisë dhe kontrollit u vu re se nena ishte akoma në gjendje të rënduar.

Doktoreshës i paraqiti me të gjithë kartelën e saj që pati kur ishte e shtruar këtu në Itali, ku përfshinte çdo gjë që ishte bërë atje, nga mjekimet e deri tek analizat. Pneumologia i tha që të nesërmen duhej të merrte një letër tek mjeku i familjes dhe duhej shtruar urgjent.

Sipas doktoreshës, edhe pse një trajtim shumë i mirë në Itali (që kjo do të thotë që absolutisht fakti që nëna ka qenë në Itali s‘ju ka fshehur askujt) nëna sërish pas 10 ditëve nuk kishte një gjendje të mirë shëndetësore.

Një ditë më pas u shtrua në spital dhe gjendja vetëm sa po rëndohej dita-ditës.

Ime më i ka kërkuar vetë doktoreshës një tampon për koronavirus për nënën duke parë situatën e nënës që po përkeqësohej pa arsye, tampon ky që u refuzua nga doktoresha me justifikimin që ajo nuk ka shenja klinike. Vetëm ditën e fundit familjarët e mi e marrin vesh nga TV që nëna del pozitive, dhe më e rënda akoma e marrim vesh nga TV sërish që nëna ndërroi jetë. Zoti mos na provoftë kurrë me një sprovë të tillë.

Falë Zotit familjaret e mi të gjithë, mjekë e infermierë kanë dalë negativë, e çuditshme, por elhamdulilah e vërtetë. E çuditshme për vetë faktin se si ka mundesi që një virus i tillë brenda këtyre ditëve të mos i transmetohet askujt…

Ndërkohë që vetëm sot (dje) doli që një mjek i spitalit të Durrësit paska dalë pozitiv, ndërkohë që nëna si mjeke kryesore për të ka pasur pneumologen, e cila është negative nga ky virus.

Se çfarë ka ndodhur vërtet, ia kemi lënë në dorë të madhit Zot.

Lutem qe edhe për raste të tjera që po ndodhin në Shqipërinë tonë të dashur mos t’ju vihet faji familjarëve për heshtjen e tyre siç ndodhi me ne, por të mbajnë mjekët përgjegjësinë për çfarë ka ndodhur dhe për faktin që akoma vazhdojnë të heshtin për të vërtetën duke i bërë të fajshëm familjarët e pafajshëm.