Ish-Presidenti: Të monitorohen rreptë donacionet, Qeveria mund t’i zhdukë!

Ish-Presidenti Bujar Nishani, aktualisht Kryetari i Këshillit Kombëtar të PD-së, ka kërkuar publikisht prej opozitës, medias, shoqërisë në tërësi, monitorim të rreptë të mbi 1 miliard eurove financime, që iu dhanë Shqipërisë për rindërtimin nga tërmeti.

“Qeveria shqiptare si njëra prej 3 qeverive më të korruptuara të botës, bashkë me ato të Laosit dhe Sierra Leones, rrezikon t’i zhdukë.

Miqtë dhe partnerët ndërkombëtarë i ofruan shqiptarëve të dëmtuar nga tërmeti mbi 1 miliard euro. Tashmë kjo shumë është e mjaftueshme që çdo familje e dëmtuar të ketë një shtëpi të re dhe orenditë brenda saj.

Me këtë shumë parash, çdo pallat, shtëpi, dyqan e objekt tjetër i dëmtuar duhet shembur në tokë e ngritur i ri mbi rrënojat e të vjetrit”, shkruan Nishani.

Në vijim, ish-Presidenti thekson se shqiptarët e dëmtuar duhet të marrin tashmë ndihmën e madhe që miqtë ju dhanë për zëvendësimin e dëmeve që pësuan.

“Por, njëkohësisht rreziku i korrupsionit dhe vjedhjes së këtyre parave të shqiptarëve të dëmtuar është shumë i lartë.

Qeveria shqiptare si njëra prej 3 qeverive më të korruptuara të botës, bashkë me ato të Laosit dhe Sierra Leones, rrezikon t’i zhdukë në xhepat e hajdutëve këto para në vend të ndërtimit të shtëpive të reja e paisjeve për çdo familje të dëmtuar.

Ndaj është detyrë dhe përgjegjësi e madhe e opozitës, medias, shoqërisë në tërësi të monitorojë çdo ditë kalimin e parave të dhëna tek shqiptarët e dëmtuar dhe jo në xhepat e qeveritarëve të korruptuar”, thekson Nishani.