Mbyllja e shkollave që u rikonstruktuan para një viti/ PD denoncon Veliajn: Krim korruptiv me pasoja…

Partia Demokratike ka akuzuar sot Kryetarin e Bashkisë Erion Veliaj si përgjegjësin kryesor të shkatërrimit të shkollave dhe gjimnazeve të Tiranës, që ai  me bujë e me zhurmë ka pretenduar gjithë këto vite se i kishte rikonstruktuar me cilësi të lartë.

PD e konsideroi krim korruptiv në ndërtim këtë, atë që e nxori zbuluar tërmeti i 26 nëntorit.

Pedagogu Luçiano Boçi shkoi sot përpara gjimnazit “Sami Frashëri “ në Tiranë, të mbyllur pas tërmetit, pasi u dëmtua, dhe deklaroi se atij duhej t’i vihej shiriti nga Policia “Mos kalo, skenë krimi” duke i drejtuar gishtin e akuzës, Veliajt.

“E shihni vetë, tha Boçi, atë që pushteti lokal dhe pushteti qendror iu ka bërë nxënësve të shkollës “Sami Frashëri”. Sikurse ka braktisur këta nxënës, ashtu ka braktisur të tjerë nxënës në zonat e prekura nga tërmeti, në shkollat e dëmtuara ku ende nuk është vënë dorë dhe nuk ka inspektim të plotë të dëmeve; po kështu, janë braktisur me mijëra qytetarë sot të lënë mes katër rrugëve, mes shiut dhe në udhëkryqin e fatit të tyre të mbrapshtë pa asnjë mbështetje nga kjo qeveri.

Siç e shihni, shkollës i është vënë dryni, kur  në fakt duhet t’i ishte vënë shiriti i vendit të krimit. Ky është një krim korruptiv, ndërtimor që po përpiqet të fshihet në të gjitha format dhe mënyrat. Madje dhe shkarkimi i drejtoreshës militante është bërë për këtë arsye.

Mos të harrojmë që kjo shkollë është rikonstruktuar para një viti me bujë të madhe dhe me tam tame dhe me zhurmë, ku vetë Kryetari i Bashkisë ka ardhur dhe ka garantuar prindërit dhe mësuesit për sigurinë e ambienteve. Por situata mbrapa flet ndryshe.

Nuk ka pasur dhe as siguri as për nxënësit dhe as për prindërit, madje mungon dhe transparenca që duhet të paraqesë bashkia e Tiranës për çertifikimin, kolaudimin, për projektin inxhinjerik dhe të drejtën e ndërhyrjeve në elementet kryesorë mbështetës të ndërtesës, e cila sot është e rrënuar dhe e pafrekuentuar nga nxënësit dhe mësuesit.

Fasada e propagandës nuk mund të mbulohet sepse realiteti është ulëritës dhe nuk e mbulon as Rama me ecejaket e tij dhe me batutat, me talljet që u bën qytetarëve, nuk e mbulon as Veliaj që fshihet pas gishtit të propagandës dhe në vend të fshihet pas gishtit të propagandës, do ta ftoja të vinte këtu që t’i jepte përgjigje pyetjeve:

Kush mban përgjegjësi për situatën në shkollën “Sami Frashëri”, që gjoja është rikonstruktuar?

Kush mban përgjegjësi për shkollat e dëmtuara në Tiranë, “Emin Duraku”, “Petro Nini” etj dhe si u procedua për të nxjerrë firmën fituese që bëri rikonstruksionin?

T’i japë përgjigje pyetjes sa para janë harxhuar për rikonstruksionin dhe a mban bashikia përgjegjësi për situatën e shkaktuar në këtë shkollë dhe shkolla të tjera?

Këtë duhet të bëjë kryetari i bashkisë dhe jo të përpiqet të mbulojë gjurmët e krimit korruptiv dhe ndërtimor që kemi mbas nesh. Boll me propagandë, përgjegjësitë t’i marrin ata që kanë kryer krimin e korrupsionin dhe t’i japin llogari qytetarëve”, tha Boçi.

boci 1