Basha: Shqiptarët e kanë kuptuar se perdja ka rënë…

126

Kryetari i PD-së, Lulzim Basha nga Vlora në një diskutim të gjatë me studentë dhe pedagogë tha se, integrimi i Shqipërisë në Europë nuk mund të bëhet me mashtrime, por vetëm kur ligji të zbatohet njësojë për të gjithë.
Duke iu referuar sanksioneve ligjore të parashikuara në Kodin Penal për vjedhje dhe blerje votash, Basha tha se po të ishte zbatuar, Vangjush Dako sot duhet të ishte në burg dhe jo kryetar bashkie.
“Kodi penal i Republikës së Shqipërisë i amenduar pas 17 majit thotë se kush kapet duke vjedh vota: Vendin e ka në burg. Në vend që ta kemi Vangjush Dakon në burg, sot e kemi kryetar Bashkie. Esenca që e ndanë një shoqëri europiane apo jo evropiane është mënyra se si zbatohet ligji. Dera e Europës nuk hapet me hilera. Do të garantojmë që ligjit aty ku është thyer të kthehet dhe të zbatohet, por do të garantojmë që edhe abuzuesit të gjykohen për shkeljen e kryer. Kjo do të marrë fund, pavarësisht nëse je votues i PD apo i PS-së. Çdo mësues është vizionar, është prindi i dytë.
Shqiptarët e kanë kuptuar se perdja ka rënë dhe mbështetjen tonë e keni të pakufishme. Në Europë shkohet me sjellje europiane. Nuk njoh vend europian që nuk ka pedagogë që kundërshtojnë politikën. Ne do të stimulojmë mendimin e pavarur dhe mendimin publik”, tha mes tjerash Basha.

“Do rrisim me 25 përqind numrin e mësuesve në sistemin parauniversitar”
Gjatë një bashkëbisedimi në Vlorë kreu demokrat Basha ka premtuar rritjen me 25 për qind të mësuesve në sistemin parauniversitar.
Ndërkohë mësuesi Edmond Fetahu tha gjatë takimit duke ju drejtuar kreut të opozitës, se “ju përgëzoj për projektin serioz për arsimin. Ishte shumë serioz, ishte kapur demi nga brirët si i thonë. Në 8 vitet e qeverimit të PD, një vëmendje ju kushtua rritjes së pagave të mësuesve. Në tregun e sotëm, pozicioni i mësuesit është një pozicion joatraktiv, çka sjell rënien e cilësisë së mësimdhënies…”
Kreu demokrat Basha thya se “alternativa për arsimin 9-vjeçar dhe arsimin e mesëm konsiston në dy shtylla. Së pari, rritja e financimit për infrastrukturën parësore, shkollën, ambientet. Sipas llogarive tona kërkon një investim prej 120 mln eurosh në vit për një periudhë 6 vjecare që sipas projeksioneve aktuale demografike, në çdo cep të Shqipërisë të kemi infrastrukturë cilësore arsimore”.
“Së dyti, vijoi Basha, mbështetja me kapacitetin njerëzor, pra mësuesit dhe kapacitetet e tjera profesionale, në mënyrë që shkolla të ofrojë jo vetëm mbulimin e detyruar të programit mësimor, por edhe për të ofruar një kohë shtesë, derisa të dalin prindërit nga shkolla, në mënyrë që të avancojmë edhe aktivitete ekstrakurrikulare.
Kjo kërkon një investim të fortë që konsiston me një rritje prej 25 % të numrit të mësuesve në sistemin parauniversitar, dhe do të kërkojë po kështu një investim për mbështetjen e orarit të zgjatjes me një kosto minimale prej afro 300 dollarësh në vit për t’i mbështetur me ushqim në një vakt nxënësit e shkollave 9 vjecare e të mesme”. Me këto shpenzime, përqindja shkon nga 4,7 sot në 5,2 përqind. Nuk është diçka që bëhet aloko fondet sot dhe nesër bëhet realitet, ky është një proces që kërkon kohë. Por e rëndësishme është që kohë të mos humbasim më. Të niset me një plan kombëtar që të bëhet realitet.