Mima-socialistëve: Lexoni raportet e ndërkombëtarëve, 3 klane në qeveri, hashashi, kokaina dhe heroina

Në Komisionin e Medias në Kuvend, ku ishte thirrur kreu i AKEP-it Ilir Zela, në lidhje me mbylljen e një portali ka patur diskutime të ashpra gjatë ditës së sotme.
Por Zela nuk i është përgjigjur thirrjes së Komisionit Kuvendor, duke sjellë që debatet të bëheshin mes deputetëve të opozitës dhe mazhorancës.
Duke folur në këtë Komision, deputeti i PD-së Florjan Mima u shpreh se nuk është problem vetëm mbyllja me urdhër qeveritar i një portali, por edhe 30 mijë familjet që u është hequr asistenca.
Mima tregoi edhe për 3 klanet që drejtojnë qeverinë shqiptare dhe Ministrinë e Brendshme.
Fjala e Florjan Mimës në Komisionin e Medias
Ju po diskutoni sot për heqjen e aksesit në një portal dhe unë mendoj se kjo është shumë e rëndësishme siç është e rëndësishme heqja e aksesit të 30 mijë familjeve që janë përzënë nga skema e ndihmës ekonomike dhe nuk kanë akses për një kothere bukë, nuk kanë akses për të njomur buzën me ujë.
Kjo është po aq e rëndësishme sa heqja e aksesit të 380 mijë vetave që nuk u lejohet të vijnë në atdheun e tyre por përzihen me shkelma.
Po aq sa është e rëndësishme mbyllja e 5 mijë bizneseve në vetëm tre muaj.
5 mijë biznese janë minimalisht 10 mijë të punësuar, sot nuk kanë akses të marrin rrogën e tyre. Njësoj sa mungesa e hapjes së negociatave.

Është e qartë për të gjithë tashmë që negociatat nuk hapen se nuk do PS, se nuk do PD, jo.
Unë kam bindjen se mes jush kolegë të mazhorancës ka njerëz që duan ta mbajnë kokën lart.
Një pjesë fare e vogël dhe ajo e lidhur specifikisht me Rilindjen, ata mund të kenë arsye për të mbajtur kokën poshtë.
Le ta mbajnë për këtë zarar të madh që i bëjnë vendit.
Kush janë klanet?
Shihni rotacionin e klaneve në Ministrinë e Brendshme.
Klani i marihuanës iku. Erdhi, kreu misionin e vetë e kanabizoi vendin dhe në xhiro vjetore thotë EUROPOL, 9 miliard euro, 4 miliard është buxheti i shtetit i Shqipërisë.
9 miliard euro dhe pjesa më e madhe vjen nga Shqipëri, thotë EUROPOL.
Në ikje e sipër është plani i kokainës.
2 miliard e gjysëm euro, thonë Kombet e Bashkuara.
Por krimi më i madh nuk është ky, krimi më i madh është se 2.5% e popullisë është “addicted” (të varur) tek kokaina. Janë 80 mijë shqiptarë që nuk e dinë a e kanë jetën e sigurt apo jo.
Kanë rënë në kthetrat e kësaj droge dhe vështirë të dalin pa një përpjekje serioze të të gjithë ne.
Ka edhe një klan tjetër.
Klani i heroinës, siç do vijë shumë shpejt e do ikë edhe ai.
Prandaj nuk hapen negociatat.
Lexoni raportin e OSBE-së.
Janë ulëritëse. Klithmat e tyre për një vend që do të anëtarësohet në BE por nuk ka Gjykatë Kushtetuese.
Nuk ka Gjykatë të Lartë.
Në partinë Socialiste ka njerëz të mirë, të ndershëm, që e duan këtë vend, duan edhe integrimin.
Ju duhet të çliroheni urgjentisht nga Rilindja!