117 të vdekur nga aksidentet rrugore në 6 muajt e parë

117 persona kanë humbur jetën në aksidente rrugore në 6 muajt e parë të këtij viti. Asnjë masë ndëshkuese nuk i ndërgjegjëson qytetarët të respektojnë rregullat e qarkullimit rrugor dhe thuajse çdo ditë ndodhin aksidente në vend.
Muaji qershor i këtij viti ka shënuar rritje të numrit të aksidenteve krahasuar me një vit më parë. Të dhënat zyrtare të Institutit të Statistikave tregojnë se në qershor rezultojnë 185 aksidente me një rritje 2.2% krahasuar me qershor 2016.
Por në të kundërt ka qenë tendenca e të aksidentuarve. Ky numër është ulur me 4.7% krahasuar me të njëjtën periudhë të një viti më parë. Të njëjtin trend ka pasur edhe pjesa e aksidenteve me pasojë vdekjen e personave të përfshirë. Në qershor rezultojnë 12 persona që kanë humbur jetën nga aksidentet një shifër kjo 46.4% më e ulët se i njëjti muaj i një viti më parë.
INSTAT verën se të rinjtë mbeten kontingjenti që ka kryer edhe numrin më të lartë të aksidenteve.
“Në qershor, aksidentet rrugore, në 73,0% të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve është kryer nga grup mosha 16 – 25 vjeç duke zënë 24,3% të numrit të aksidenteve rrugore dhe duke u rritur me 66,7%, krahasuar me të njëjtën periudhë të një viti më parë”, vlerëson INSTAT.
Po kështu në gjashtëmujorin e parë 2017, aksidentet rrugore të cilat kanë ndodhur si pasojë e sjelljes së drejtuesit të mjetit zënë 79,9% të rasteve. Numri më i lartë i aksidenteve është kryer nga grup mosha 25-35 vjeç, duke zëne 28,3% të numrit të aksidenteve rrugore dhe duke shënuar ulje 9,3%, krahasuar me njëjtën periudhë të një viti më parë, raporton “Monitor”.
Në qershor 2017, numri të aksidentuarve për 100.000 banorë ishte afërsisht 8 persona. Krahasuar me mesataren e vitit 2016, ky numër u rrit me 5,8%.