Berisha: Nuk do ia falja vetes po të mos luaja me Kosovën!

Besart Berisha ka mbajtur një konferencë për shtyp pas mbërritjes së tij në Kosovë, ku ka udhëtuar për t’u bërë pjesë e përfaqësueses së këtij vendi. Ish-sulmuesi i përfaqësueses shqiptare, do të veshë fanellën verdheblu, të cilën e ka vlerësuar si objektivin që i kishte vënë vetes prej shumë kohësh.
“Nuk do ia kisha falur asnjëherë vetes nëse nuk do të luaja për Kosovën. Kam ardhur se dua të ndihmoj Kosovën, e dua vendin tim”, tha ai para gazetarëve.
“Jam shumë i lumtur që jam këtu. Kam kërkuar gjithmonë të luaj për Kosovën dhe më në fund po më plotësohet dëshira. Kjo është gjëja më e rëndësishme për momentin. Unë do jap maksimumin për të shënuar, pasi si sulmues që jam, kam dëshirë të shënoj sa më shumë.
Por e rëndësishme për mua si fillim është të njihem sa me parë me shokët e skuadrës dhe të integrohem në grup. Pastaj do të shohim se si do të luajmë në takimet e radhës. Islanda? Është e fortë. Edhe pse duam fitore e kemi parë se sa të fortë janë në Europian”, deklaroi Berisha.