Obama: Lufta kundër terrorit nuk është luftë kundër islamit

Në fjalimin e tij të fundit mbi sigurinë kombëtare, presidenti Barack Obama falënderoi trupat amerikane për ruajtjen e sigurisë në Amerikë dhe pa përmendur emrin e tij, hodhi poshtë thirrjet e presidentit të zgjedhur, Donald Trump, për ndalimin e hyrjes së myslimanëve në SHBA dhe mbështetjen e shprehur gjatë fushatës së tij për përdorimin e torturës.
Në fjalimin e tij para trupave në bazën ajrore MacDill në shtetin juglindor të Floridës, presidenti Obama tha se, “gjatë tetë viteve të shkuara asnjë organizatë terroriste nuk ka arritur të planifikojë dhe të përmbushë ndonjë sulm në atdheun tonë”, duke nënvizuar se kjo nuk do të thotë që nuk ka pasur përpjekje. “Kjo është rezultat i punës suaj”, u tha ai trupave.
Para fjalimit ai takoi dhe falënderoi komandën qendrore dhe udhëheqësit e operacioneve të posaçme në MacDill.
Presidenti Obama shpalosi pikëpamjet e tij për gjendjen e luftës kundër terrorizmit, pas dy mandateve të tij, duke marrë duartrokitje të fuqishme kur tha se udhëheqësi i Al-Kaidës, Osama bin Laden, është i vdekur.
Ai tha me krenari që kur kishte marrë postin, 180 mijë trupa amerikanë ishin në Irak e Afganistan, ndërsa ky numër tashmë ka zbritur në 15 mijë.
Ai tha se shkurtimi i trupave tokësore në zonat e luftës, shënon ndryshimin e strategjisë për t’u mbështetur më shumë në ngritjen e koalicioneve të fuqishme ndërkombëtare dhe mbështetjes në partnerët lokalë, me qëllim të zvogëlimit të viktimave amerikane dhe të shpenzimeve.
Presidenti Obama theksoi përparimin e arritur në luftën kundër grupit militant Shteti Islamik. “Kryesorja ne po i thyejmë kurrizin ISIS-it”. Ai tha se kostoja ishte shumë më e ulët sesa gjatë administratave të mëparshme.
Ai tha se me gjithë përparimin e arritur, puna nuk është kryer, ndërsa theksoi se gjatë viteve të fundit, sulmet më vdekjeprurëse në vend janë kryer nga “individë vendas të izoluar dhe të radikalizuar nëpërmjet internetit”.
“Terroristët e sotëm mund të vrasin njerëz të pafajshëm, por nuk paraqesin kërcënim ekzistencial për kombin tonë”, tha presidenti Obama, duke theksuar se terroristët janë vrasës e banditë dhe si të tillë duhet të trajtohen.
Presidenti Obama tha se administrata e tij e ka ndaluar torturën. “Mbështetja e vlerave tona dhe respektimi i sundimit të ligjit, nuk është dobësi. Në fakt është fuqia jonë më e madhe”, tha ai.
Gjatë fushatës, Donald Trump, u zotua për qëndrim më të ashpër ndaj terroristëve dhe familjeve të tyre dhe se e mbështet torturën.
Presidenti Obama tha se është koha e fundit për të mbyllur burgun në Gjirin e Guantanamos, duke e cilësuar atë “një njollë” për Amerikën.
Duke kritikuar thirrjet e zotit Trump për ndalimin e myslimanëve, presidenti Obama tha se lufta kundër terrorit nuk mund të jetë luftë kundër islamit, duke shtuar se, “mbrojtja e lirisë është diçka që e bëjmë për të gjithë amerikanët, jo vetëm për disa”.