“Klan” dhe “Top Channel”, viktima të Ramës, mashtrimet e turpshme me Merkel

Të gjitha mediat e kontrolluara nga qeveria kishin dje të njëjtat fraza. Lideri global e ktheu dhimbjen në forcë pas dështimit për të marrë përgjigjen pozitive të Gjermanisë për hapejn e negociatave. Për të mbuluar këtë dështim ai thirri nën armë edhe mediat, të cilat e konsideruan takimin si një sukses. Televizoni “Klan” dhe “Top Channel” dëshmuan edhe një herë tjetër dje se janë viktima të Ramës dhe propagandës së tij të lavazhit të trurit ndaj shqiptarëve. Si “Top Channel” ashtu edhe “Klan” censuruan Kancelaren Merkel, kur përmendi si kushte për hapjen e negociatave luftën ndaj krimit dhe korrupsionit si dhe deklaratën që ajo bëri me zgjedhjet. Madje “Klan” shtoi edhe më tej duke bërë një diversion në deklaratat e Kryetarit të Grupit parlamentar të CDU-CSU, Krichbaun. Sipas “Klan”, Merkel i hodhi poshtë ato, megjithëse Kancelarja në të vërtetë i konfirmoi pikë për pikë. “Top Channel”, një tjetër media e kthyer në qesharake për shkak të shndërrimit në kazan plehrash të dezinformimeve ndaj publikut mashtronte me deklaratën e Merkel, duke thënë se kushti i vetëm për hapjen e negociatave sipas Merkel ishte Vettingu, kur në fakt, në asnjë rresht të deklaratës kjo nuk u citua nga Kancelarja.