Suksesi i Trump

Përkrahësit e Donald Trumpit shpesh përmendin aftësitë e tij si biznesmen si një ndër arsyet për mbështetjen që i japin kandidatit republikan. Por një libër i ri mbi karrierën e zotit Trump sjell një histori më komplekse, duke cituar admirues, por edhe kritikë të tij.
Para se të konkurronte për president, Donald Trumpi ishte sipërmarrës dhe manjat në sektorin e imobiliareve në Nju Jork, ku suksesi i tij përmendej shpesh në emisionin serial televiziv “The Apprentice”.
“Për të bërë biznes në Nju Jork duhet të jesh shumë i fortë, shumë i përkushtuar. Ai personifikon biznesmenin njujorkez”, thotë juristi Edward Mermelstein. “Ai mban mend çdo gjë: shitësit, kontraktorët, detajet e projektit…”.
Marc Fisher dhe Michael Kranish janë bashkautorë të librit të fundit “Trump Revealed”, i cili ndjek rrugëtimin e Trumpit drejt konkurrimit për Shtëpinë e Bardhë, si dhe marrëveshjet e biznesit që bëri gjatë viteve:
“Ai beson se si shef ekzekutiv i një kompanie të madhe, është i përgatitur për çdo skenar”, thotë Marc Fisher, një ndër bashkautorët e librit.
Në intervista intensive me zotin Trump, autorët zbuluan se një pjesë e madhe e suksesit u arrit nga mënyra si Trumpi e marketonte emrin e tij. Emri Trump spikat dukshëm mbi çdo ndërtesë, përfshirë hotelin e tij të ri në Uashington. Gjatë viteve ky emër është shndërruar në simbol të një pasurie ekstravagante.
“Ai ka bërë para duke dhënë me qira të drejtën e përdorimit të emrit Trump. Njerëz të tjerë bënë para duke investuar në ndërtesat me emrin e Trumpit. Pra, nuk kishte si të dilte i humbur”, thotë Michael Kranish, bashkautor i librit.
Por të tjerë dolën të humbur nga biznesi me Trumpin. Kompania e zonjës Beth Rosser kishte një kontratë për të instaluar parete për banjot në kazinonë Trump Taj Mahal në qytetin Atlantic City në Nju Xhërsi:
“Kontrata ishte mbi 230 mijë dollarë, një ndër projektet më të mëdhaja që kemi marrë përsipër”, thotë bashkëpronarja e kompanisë. Por kur erdhi koha për të paguar, tregon zonja Rosser, ata mësuan se Donald Trump kishte deklaruar falimentim dhe nuk do të paguante.
“Na u desh të mbushnim dokumente, të merrnin avoketër, plot kokëçarje për të marrë ndonjë pagesë”, thotë zonja Rosser.
Si përfundim ata morën 30% të vlerës që u takonte, pas 2 vjet e gjysmë nëpër gjyqe. “Ka një listë të gjatë shitësish, kontraktorësh, aksionerësh që humbën gjithçka pasi hynë në ujdi me Trumpin”, thotë bashkautori Marc Fisher.
Pavarësisht nga këto taktika biznesi, autorët argumentojnë se Donald Trump është shumë i zoti për të deshifruar dëshirat e publikut, qoftë për një jetë luksi apo për t’u përfshirë në vendimmarrje.
“Nuk mund të shohësh Donald Trumpin pa kuptuar gjendjen e vendit. Ai po i jep zë ndjenjës së ankthit që ka ekzistuar prej kohësh”, thotë autori Kranish. Tani u takon votuesve të vendosin nëse biznesmeni njujorkez mund të bëhet edhe president i Shteteve të Bashkuara.