Atletico thyen Bayernin, vendos Carrasco

during the UEFA Champions League semi final first leg match between Club Atletico de Madrid and FC Bayern Muenchen at Vincente Calderon on April 27, 2016 in Madrid, Spain.

Në “Vicente Calderon” feston Atletico e Madridit. 5 muaj më pas skuadra e Diego Simeones mposhti sërish me rezultatin 1-0 Bayernin e Mynihut duke u ngjitur në krye të Grupit D, të UEFA Champions League. Pasi eliminoi Bayernin e Guardiolës nga gjysmëfinalet e Championsit një sezon më parë, El Cholo Simeone fitoi edhe duelin personal ndaj Carlo Ancelottit. Belgu, Yannick Ferreira Carrasco me një goditje të bukur i dha avantazhin Atleticos në minutën e 35-të. Los Colchoneros mund të kishin dyfishur shifrat në të 84-tën, por Griezmann goditi shtyllën nga 11 metra distancë, pas një penalltie të akorduar në favor të Atleticos për një faull të Vidal ndaj Filipe Luis. Ndeshja tjetër e Grupit D mes rusëve të Rostovit dhe PSV Eindhovenit përfundoi në barazim 2-2.
Në Grupin A duelin e vëllezërve Xhaka e fitoi Graniti. Në Londër Arsenali iu fal Theo Walcot-it që realizoi dy herë për të mposhtur me shifrat 2-0 Baselin. Titullarë të dy vëllezërit Xhaka. Taulanti, mesfushori i kombëtares shqiptare u aktivizua në qendër të mbrojtjes nga trajneri Urs Fischer në këtë ndeshje. Me këtë fitore Arsenali u ngjit në kuotën e 4 pikëve po aq sa edhe Paris Saint Germain, që triumfoi 1-3 me përmbysje në transfertën bullgare ndaj Ludogorets. Matuidi iu përgjigj golit të Natanael, përpara se Cavani të realizonte dy herë në fraksionin e dytë.
Në Grupin B, kryeson me pikë të plota Napoli që kaloi lehtësisht në “San Paolo” Benficën me rezultatin 4-2. Marek Hamsik, Mertens me një dygolësh dhe Milik i çuan shifrat në 4-0 në favor të skuadrës së Sarrit, ndërkohë që në fund për Benficën realizuan Guedes dhe Salvio duke e bërë më pak të dhembshme këtë humbje. Tjetër barazim për Beshiktashin. Në Stamboll skuadra turke u ndal me rezultatin 1-1 nga Dynamo e Kievit me Tsygankov që iu përgjigj avantazhit provizor të Ricardo Quaresmas.
Në Grupin C, Barcelona pa Lionel Messin të dëmtuar fitoi 2-1 me përmbysje ndaj Borussia Moenchgladbach. Në “Borussia Park”, Thorgan Hazard kaloi fillimisht në avantazh vendasit përpara se Arda Turan dhe Gerard Pique me golat e tyre t’i jepnin fitoren e dytë dhe vendin e parë në grup Barcelonës. Ngeci në një barazim 3-3 Manchester City në transfertën skoceze ndaj Celtic me skuadrën e Guardiolës që e pa veten në disavantazh në 3 raste, por rikuperoi gjithçka me golat e Fernandinhos, Sterling dhe Nolitos.