Si transferohen paratë e kokainës për t’u pastruar në Shqipëri

445
x-default

Më 19 shkurt 2014, Marsel Bedulla- një 25-vjeçar nga Durrësi- ra pre e një kontrolli rutinë të policisë italiane, teksa po udhëtonte në rrugën “Filippo Argelati” të Milanos me makinën e tij modeste. Nervozizmi dhe të dhënat kontradiktore e drejtuan patrullën e policisë drejt garazhit të shtëpisë së tij, ku gjetën dhe sekuestruan 41 kilogramë heroinë dhe shishe të mbushura me manjitin, lëndë kimike që përdoret për të presuar heroinën.
Dyshimet e ndoqën 25-vjeçarin edhe në burg. Hetuesit italianë përgjuan një takim në burg mes Bedullës dhe vëllait të tij, Elio, ndërsa biseda përfundoi me porosinë për të mbyllur gojën.
“Dëgjo, nga shtëpia janë mirë. Po ashtu dhe të tjerët…të bëjnë të fala. Më kanë thënë të rrish i qetë… mos i ngatërro gjërat… mos fol.. kuptove!”, urdhërohet Bedulla nga i vëllai.
Ndalimi rastësor i Bedullës nxiti një hetim të gjerë të Prokurorisë italiane, e cila dy vjet pas arrestimit të tij lëshoi 40 urdhër arreste për anëtarët e organizatës kriminale, sekuestroi 130 kilogramë heroinë dhe kokainë dhe 300 mijë euro gjatë tentativës për t’u dërguar në Shqipëri.
Më 27 maj 2016, në përmbyllje të hetimeve dyvjeçare të policisë italiane, drejtues të lartë të Policisë së Shtetit njoftuan arrestimin e 12 korrierëve në Shqipëri, anëtarë të kësaj organizate.
Operacioni u kodua me emrin “RICCIO”, ndërkohë që policia italiane dhe ajo shqiptare deklaruan se, “organizata kriminale kishte transferuar nga Italia në Shqipëri mbi 2 milionë euro të dokumentuara, ndërkohë që përfitimet nga trafiku i drogës mendohet se janë shumë herë më të larta”.
Dosja e hetimit e Prokurorisë italiane, e siguruar nga “BIRN” tregon se organizata e narkotrafikut kishte në përbërjen e saj 31 shqiptarë dhe nëntë të huaj, mes të cilëve marokenë, tunizianë dhe rumunë. Ajo drejtohej nga Amarild Karanxhaj, një 32-vjeçar shqiptar që i shpëtoi operacionit dhe sot gjendet në arrati.
Hetimet 2-vjeçare të policisë dhe Prokurorisë italiane tregojnë se anëtarët e kësaj organizate bënin një jetë asketësh në Itali. Në dosje thuhet se ndryshe nga trafikantë të tjerë, ata nuk blenin makina të shtrenjta dhe nuk frekuentonin jetën e natës.
Organizata kriminale kishte ndërtuar gjithashtu një sistem të sofistikuar komunikimi përmes kodesh, ndërkohë që kishte ngritur në këmbë edhe një rrjet të transferimit të parave të tyre të pista nga Italia drejt Shqipërisë.
Grupet kriminale shqiptare konsiderohen tepër të fuqishme në Itali, veçanërisht në qarkullimin e tonelatave të drogës përmes vendeve të Bashkimit Europian, rrugës së njohur ballkanike apo edhe brenda Italisë. Një raport i Antidrogës italiane për vitin 2015 theksonte se përmes Ballkanit mendohet se trafikohen drejt Italisë rreth 170 tonë heroinë me një vlerë prej 25 miliardë dollarësh.

Rrjeti i furnitorëve

Më 27 maj 2016, policia shqiptare deklaroi se kishte arrestuar 12 anëtarë të rëndësishëm të organizatës së heroinës dhe kokainës, pjesë e organizatës së Amarild Karanxhajt. Në një konferencë për media, zv.drejtori i policisë, Ardian Çipa deklaroi se operacioni ishte zhvilluar në Tiranë, Durrës dhe Fier dhe suksesi i tij ishte produkt i bashkëpunimit efikas me policinë italiane.
Policia shqiptare deklaroi se kishte arrestuar Dritan Çelën, Anesti Cullin, Gerald Gjonin dhe Florjan Konokozin në Tiranë; Erald Zykën, Kridens Kërçukun, Ilirjan Orhani në Durrës; Gazmend Dimnin në Kavajë dhe Agron Sulminën e Ardit Hykën në Fier.
Policia deklaroi gjithashtu se të arrestuarit i përkisnin niveleve të ndryshme në organizatë, nga korrierët tek shpërndarësit e drogës. Çdo anëtar i saj kishte rol të qartë dhe detyra që përfshinin trafikimin, furnizimin, shpërndarjen dhe transferimin e parave nga Italia në Shqipëri.
Hetuesit italianë kanë hedhur dyshime se anëtarët e kësaj organizate kanë lidhje kriminale të forta në Shqipëri dhe se ata ishin të bindur që nuk i gjente gjë.
“E ç’të thuash për furnitorët.. janë personazhe që janë të bindur që nuk u ndodh gjë në atdheun e tyre… drejtojnë dërgimin e dhjetëra e dhjetëra kileve drogë të pastër, duke treguar se kanë mundësi në lidhje kriminale të një niveli të lartë”, thuhet në dosjen hetimore.
“BIRN” hetoi të shkuarën e dhjetë të arrestuarve në Shqipëri dhe nuk rezultojnë lidhje të dukshme mes tyre dhe bandave kriminale të hetuara apo gjykuara për trafik të lëndëve narkotike në Shqipëri.
E pyetur nga “BIRN”, Policia e Shtetit refuzoi t’u përgjigjej pyetjeve për lidhjet në Shqipëri të këtij grupi të trafikut të lëndëve narkotike. Megjithatë, një oficer i Antidrogës pohoi në kushtet e anonimatit se organizata punon për llogari të një grupi të fuqishëm kriminal me bazë në qytetin e Durrësit.
Përgjatë dy viteve, që policia italiane ka hetuar këtë bandë, janë sekuestruar 130 kilogramë heroinë dhe kokainë, si dhe ka dokumentuar dërgimin e mbi 2 milionë eurove në Shqipëri. Erald Nasto, Shahin Isufi, Ervin Taullahu, Aleksandër Demiri identifikohen si drejtuesit kryesorë të grupit, të cilët vepronin nën urdhrat e Karanxhaj.
Hetimet tregojnë gjithashtu se anëtarët e organizatës ishin të detyruar të zbatonin rregulla strikte sigurie, çfarë u mundësoi atyre një aktivitet në hije, për vite të tëra në veri të Italisë. Çdo anëtar i bandës e kishte të ndaluar të shoqërohej me njëri-tjetrin në publik.
Sipas hetimeve, ata urdhëroheshin të ishin shembullorë në komunitetin ku jetonin, si dhe të paguanin rregullisht qiratë, jo vetëm për shtëpitë ku banonin, por edhe për ato që shërbenin si bazë për paketimin e dozave të drogës.
Paralelisht me jetën e thjeshtë, anëtarët e kësaj organizate merrnin herë pas here në Itali familjarët e tyre, për të lënë përshtypjen e emigrantëve të zakonshëm.
“Duhej të shoqëroheshin sa më pak në publik, në mënyrë që askush mos të bënte lidhjet apo identifikimin e tyre”, thuhet në dosjen e siguruar nga “BIRN”.

Trafik me kode dhe transferta me autobus

Hetimet e autoriteteve italiane tregojnë se organizata e drejtuar nga Karanxhaj ka dërguar në Shqipëri mbi 2 milionë euro të fituara në trafik droge, në periudha të ndryshme kohore. Këto para, sipas hetuesve transportohen përmes linjave të autobusit Itali-Shqipëri
Gjatë dy viteve të hetimit, autoritetet italiane kanë interceptuar dhe transkriptuar qindra mesazhe të shkëmbyera mes anëtarëve të organizatës së narkotrafikut. Në pamje të parë, bisedat mes tyre duken pa asnjë llojë rëndësie, por që në fakt tregojnë për shitjen e sasive të konsiderueshme të heroinës dhe kokainës, si dhe për transferimin e parave në Shqipëri. “Fole gjë me gelen, se aty e ke? Po, ai shoku në bre ti dha albën? Po atij në bre, a ia more albën… ti më the po.. vlla janë shumë e kupton apo jo? Ti vet nuk ke mbledhur. Ça po bën se nuk po të mar vesh fare. S’po të kuptoj”, i thotë nga Shqipëria Erald Nasto, njërit prej drejtuesve të grupit në Itali, Shahin Isufit. Sipas policisë italiane, anëtarët e grupit komunikonin me kode, ku “Alba” nënkuptonte paratë, “Eda” makinën e transportit për drogën, “Gela”, shoferin e autobusit që sillte paratë në Shqipëri, “Sara” quanin blerësit e lëndëve narkotike.
“Eni” dhe “Canvas” përdoren gjithashtu shpesh në dosjen hetimore, si fjalë që nënkuptonin kokainën dhe heroinën. Përmes telefonatave dhe mesazheve të përgjuara, hetuesit italianë kanë arritur në përfundimin se Erald Nasto është furnitori kryesor i lëndës narkotike që nisej nga Shqipëria. Më 9 korrik të vitit 2015, në Bolonja të Italisë u arrestua me 13 kilogramë kokainë korrieri i tij, Vis Shaqiri, 28-vjeçari me origjinë nga Berati. Po në korrik të 2015, në Milano u arrestuan Shahin Isufi dhe Florian Lani, pasi në mjetin që ata udhëtonin u gjetën 36 kilogramë lëndë narkotike e tipit heroinë. Isufi dhe Lani kishin detyra të qarta të dorëzimit të lëndës narkotike tek shpëndarësit, por edhe grumbullimin e parave. Ndërkohë që gjithçka e raportonin tek Karanxhaj. Në njërën prej mesazheve të përgjuara, Karanxhaj jep urdhra dhe porosi nga Shqipëria për një sasi lëndësh narkotike. “Ok, po siç të thashë, jepi ritëm… boj gjonat sa më shpejt se jena shum mrapa tuna, (klientët) ça thonë, ka kërkesa? Ok, merru vesh me eda, që mos humim koh dhe me kujdes.. kur e takon eda dhe tuna.. me eda sa më pak takime”, shkruan ai.
Hetimet e autoriteteve italiane tregojnë se organizata e drejtuar nga Karanxhaj ka dërguar në Shqipëri mbi 2 milionë euro të fituara në trafik droge, në periudha të ndryshme kohore. Këto para, sipas hetuesve transportohen përmes linjave të autobusit Itali-Shqipëri apo nëpërmjet shoferëve të kamionëve të transportit ndërkombëtar. Nga përgjimet telefonike, të realizuara mes anëtarëve të grupit janë dokumentuar në dërgesa të ndryshme, dërgimi në Shqipëri i 2 milionë e 116 mijë eurove. Ndërkohë, policia italiane ka sekuestruar gjatë operacioneve të saj shumën prej 300 mijë eurosh. Hetimet kanë zbuluar gjithashtu se shoferët e përdorur për transfertat informale të parave paguheshin 1 për qind të vlerës që dërgonin në Shqipëri. Më 16 shkurt 2015, policia italiane ka dokumentuar dërgesën e parë të parave drejt Shqipërisë, por nuk ka zbuluar vlerën e plotë. Sipas dosjes hetimore, grupet kriminale shqiptare përdorin këtë lloj transporti për shkak të neglizhencës së kontrolleve që bëhet në pikat kufitare ndaj linjave zyrtare të transportit. “Paratë iu besohen shoferëve të autobusave apo kamionistëve për shkak se ky lloj transporti nuk kontrollohet mirë në pikat kufitare. Ky fakt është i rëndë, sepse nuk kemi të bëjmë me rastësi, por me një linjë krejtësisht të organizuar nga grupe kriminale”, thuhet në dosje. Bisedat dhe mesazhet e përgjuara tregojnë se transfertat ilegale të parave drejt Shqipërisë përbënin një shqetësim të vazhdueshëm për anëtarët e organizatës.
“Herë tjetër, atyre të autobusave duhet tua japësh në autogrill… është më mirë kështu”, i thotë Isufi një prej transportuesve të grupit. Pas arrestimit të disa shpërndarësve, hetimet e policisë italiane janë përqendruar tek rrethi i personave që kishin si detyrë kthimin e parave në Shqipëri. Sipas tyre, Shahin Isufi mbante kontakte të drejtpërdrejta me furnizuesit në Shqipëri, por edhe me shoferët që u besoheshin paratë. “Është e qartë që dërgimi i milionave eurove cash u besohet vetëm njerëzve të provuar”, thuhet në dosjen hetimore. “Ato janë ato që bëjnë të mundur vijimësinë e aktivitetit të shitjes së drogës, duke mundësuar vazhdimisht rikthimin e parave në Shqipëri”, shkruhet aty. Më 26 prill 2015, policia italiane ka dokumentuar transfertën e 70 mijë eurove drejt Shqipërisë dhe ka identifikuar si pjesë të këtij rrjeti një kompani transporti, të quajtur “Arjani Travel”. Policia italiane ka urdhëruar gjithashtu arrestimin e Anesti Cullit dhe Florjan Kokonozit, pasi dyshohen se si shoferë të linjës së autobusit, kanë pranuar nga Shahin Isufi 23 mijë euro dhe ia kanë dërguar ato Erald Nastros. Po këtë rol ka luajtur edhe Dritan Çela dhe Ardit Hyka për të cilët policia ka dokumentuar transportin e 40 mijë eurove, ndërsa kamionisti Ilirian Orhani akuzohet se transportoi 124 mijë euro drejt Shqipërisë.