Turqi, lirohet nga burgu aktivisti gjerman Peter Steudtner

121

Gjyqi kundër shtetasit gjerman dhe 11 veprimtarëve të tjerë të të drejtave të njeriut nisi të mërkurën në mëngjes. Gjykata vendosi: Peter Steudtner lirohet nga paraburgimi.
Pas tre muaj të kaluar në paraburgim, Gjykata vendosi që Peter Steudner të lirohet. Ndërsa ai tha se do të marrë avionin e parë të mundshëm dhe do të largohet nga Turqia për në Gjermani. Të lirë janë shpallur edhe shtatë persona të tjerë të akuzuar në këtë proces.
Procesi gjyqësor kundër Steudtnerit dhe njëmbëdhjetë aktivistëve të tjerë të të drejtave të njeriut kishte nisur më parë. Qeveria turke e ka akuzuar grupin e veprimtarëve “se ka ndihmuar organizata terroriste të armatosura” përmes veprimeve me shoqërinë civile. Qeveria i ka akuzuar aktivistët edhe për anëtarësi në Partinë Punëtore të Kurdistanit, e cila është e ndaluar në Turqi, në partinë e ekstremit të majtë, DHKP-C dhe në Lëvizjen Gulen.
Steudtner i hedhi poshtë të gjitha akuzat. Gjykatës në Stamboll ai i tha të mërkurën: “Unë jam i pafajshëm dhe kërkoj lirimin tim të menjëhershëm”.
Kritikët, duke përfshirë qeveritë e SHBA, të Bashkimit Evropian dhe të Gjermanisë, i quajtën akuzat e qeverisë kundër aktivistëve të të drejtave të njeriut të motivuara politikisht dhe “absurde”. “Ne po punojmë për këtë synim (lirimin e Steudtnerit) dhe nuk do të pushojmë së punuari për këtë”, tha të mërkurën zëdhënësi i qeverisë, Steffen Seibert.
Grupi i të akuzuarve përbëhet edhe nga kryetarët lokalë të Amnesty International, Idil Eser dhe Taner Kilic dhe nënshtetasin suedez, Ali Gharavi.
Autoritetet turke e arrestuan Steudtnerin dhe nëntë persona të tjerë në korrik, kur po ndiqnin një kurs për të drejtat e njeriut në ishullin e Buyukada-s pranë Stambollit. Kilicin e patën arrestuar disa javë më parë dhe rastin e tij e shkrinë më vonë me rastin e grupit të Buyukada-s.
Më shumë se 50.000 vetë kanë qenë burgosur dhe më shumë se 150.000 të tjerë janë pushuar nga puna në kuadër të gjendjes së jashtëzakonshme, të vendosur që kur dështoi grushti i shtetit kundër Presidentit Rexhep Tayyip Erdogan në qershor 2016. Këto veprime kanë shkaktuar shqetësim në të gjithë botën për shkak të goditjes kundër sundimit të ligjit në Turqi.