CNN: Shqipëria e zhytur në korrupsion

2555

Rrjeti televiziv amerikan më i madhi në botë deklaron se Shqipëria është një vend i zhytur thellë në korrupsion. Në një analizë të publikuar nga opinionistja e njohur amerikane Frida Ghitis, thuhet se Shtetet e Bashkuara të Amerikës shihen në Shqipëri si një autoritetet moral që flet hapur për problemet e shumta që kanë shqiptarët.
“Lidhjet e ngushta të Amerikës me Shqipërinë, nuk e kanë penguar Uashingtonin që t’i flasë ndershmërisht një vendi ende të zhytur në problem, përfshi korrupsionin e ngulitur thellë. Sjellja amerikane, që i shndërron fjalët në vepra, ka bërë që SHBA të shihet si një autoritet moral nga shqiptarët”.
CNN, që për shumë vëzhgues është më afër qëndrimeve të administratës aktuale të drejtuar nga Presidenti Obama, i bën komentet pak ditë para se kryeministri Rama të zhvillojë vizitën e tij në Uashington. Në analizën e CNN, ku i është lënë një vend i rëndësishëm marrëdhënieve të ngushta shqiptaro-amerikane dhe modelit shqiptar të bashkëjetesës fetare, theksohet se qasja e SHBA ndaj Shqipërisë është një shkrirje mes idealizmit dhe veprimeve konkrete. Shqiptarët ranë në dashuri me SHBA në 1919, kur Presidenti amerikan Wilson nuk lejoi fuqitë europiane në Konferencën e Paqes në Paris që të copëzonin Shqipërinë ndërmjet fqinjëve.
Opinionistja Ghitis përfundon analizën e saj me përfundimin se çfarë qëndron në themel të dashurisë që shqiptarët kanë për SHBA. “Besoj se është e qartë se në themel të dashurisë së shqiptarëve për SHBA është integriteti i amerikanëve në veprat e tyre për Shqipërinë dhe shqiptarët, duke qëndruar në mbrojtje të tyre, duke mbështetur standardet amerikane të demokracisë pluraliste, dhe duke mos u penduar për ndihmën që i dhanë shqiptarëve për të fituar lirinë”.